ئەمڕۆ دووشەممە، رێکخراوی (کوردستان فاوندەیشن)، کەمپینێکی بۆ ئاڵای کوردستان لە هەردوو پارێزگای هەولێر و سلێمانی ڕاگەیاند، كە دانانی ژمارەیەك ئاڵا و گۆڕینی ئاڵای كۆنبوو و بڵاوكردنەوەی هۆشیاریی پێویست لەبارەی ئاڵاوە لەخۆ دەگرێت. کەمپینەکە بە ناوی (ئاڵاکەمان)ە و بە هەمان هاشتاگی #ئاڵاکەمان لە کاتژمێر ١٠:٣٠ خولەکی ئەمڕۆ دووشەممە ٢٤/٨/٢٠٢٦ لە باڵەخانەی پارێزگای سلێمانی، بە بەشداریی پارێزگار دەست پێدەکات، رۆژی ١/٩/٢٠٢٦ لە باڵەخانەی پارێزگای هەولێر بە بەشداریی پارێزگار کۆتایی دێت. لە کەمپەینەکەدا، رێکخراوی کوردستان فاوندەیشن، ١٢٠٠ ئاڵای کوردستان بە قەبارەی ستاندارد لە شوێنە گشتییەکانی پارێزگای هەولێر و سلێمانی بە یەکسانی، جێگیر دەکات، جگە لە ١٠ ئاڵای قەبارە (٨م بە ١٦م)، کە پێنج لەو ئاڵا گەورانە لە هەولێر هەڵدەکرێن و پێنجیشیان لە سلێمانی. رێکخراوی کوردستان فاوندەیشن تۆڕێکی رێکخراوەیی قازانجنەویستە، کار بۆ بونیادنانی کۆمەڵگەیەکی پێشکەوتوو و پەرەپێدانی تواناکانی هەرێمی کوردستان دەکات. ستراتیژی ئەو رێکخراوە پاراستنی کولتوور و نەریت و بەها ڕەسەنەکانی کوردستانە و ئامانجیشی، پەرەدانە بە هەستی نیشتیمانیبوون، بونیادنان و پێشکەوتنی کوردستان. هەروەک لە راگەیەندراوەکەیاندا هاتووە، ئامانجی رێکخراوی کوردستان فاوندەیشن لەو کەمپینەدا، کە تێیدا جگە لە ئاڵای کوردستان، رێگە بە نیشاندانی هیچ ئاڵا و دروشمێکی سیاسی نادرێت، بڵاوکردنەوەی ئاڵای کوردستان و چیرۆک و مانا و شێوازە دروستەکانی هەڵکردنی ئاڵایە.