ان بە هۆی گڕوتین و دەنگدانەوەی سروودەكە، بە فەرمانی مەلا مستەفا بارزانی ئەو سروودە دەكرێتە مارشی شۆڕش و، لە پاش پارچە مۆسیقایەكەی چەمی ڕێزان پەخش كرایە.
ئەو گۆرانیبێژانەی لەو سەردەمەیدا دەركەتن ئەوانە بوون: فوئاد ئەحمەد، یەحیا مەرجان (1936-2016)، تەحسین تەها، عومەر دزەیی، عەبدوڵلا دڵسۆز، عوسمان شارباژێڕی و چەندانی دیكە.
لە ساری 1968 تیپی سەندیكای مامۆستایان دادەمەزرێ، یەحیا مەرجان سەرۆكی ئەو تیپەی بووە و (15) ئەندامی میوزیكژەنی هەبووە، لە دیارترین ئەندامەكانی چەتۆ حەسەن، جەمال هیدایەت، تەحسین تەها، واحید مەرجان، شێرزاد عوزێری و مستەفا رەئوف بوون.
لە پاش ڕێكەوتننامەی 11ی ئازاری 1970 و پێدانی ئۆتۆنۆمی بە كوردستان، بارودۆخێكی نوێ ڕەخسا و هونەریش وەكی هەموو بوارەكانی دیكە بووژاوە و چالاكیی هونەریی دەستی پێكردەوە، لۆیێ هەر لەو سارەی سەباح عەبدولڕەحمان داواكارییەك لۆ پارێزگاری هەولێرێ خالید عەبدولحەلیم بەرز دەكاتەوە، تا ڕێگایان بدات لە هۆڵی شارەوانی ئاهەنگەكی گۆرانی و مۆسیقا ساز بكەن، ئەویش بە نووسراوی ژمارە (34/3850) لە 5/4/1970 وەرامی دابوونەوە و تا چالاكی بنوێنن، هەر لەو سارەیدا (تیپی یانەی وەرزشی هەولێر) دامەزرا، كە تیپێكی هونەری بوو، بە سەرۆكایەتیی شێرزاد محەمەد حوسێن (سەرسپی) و پێنج میوزیكژەنی دیكە، لە ساری 1971ش (تیپی یەكێتیی لاوانی دیموكراتی كوردستان)، بە سەرۆكایەتی شێرزاد محەمەد و حەفت ئەندامی دیكە دامەزرا، لە 1/2/1971 بە فەرمانی وەزارەتی ناوخۆ ژمارە (712) تیپی هونەری هەولێر دامەزرا، ئەم تیپە بە سەرۆكایەتیی جەمال هیدایەتی بوو، زۆربەی ئەندامەكانی ئەوانە بوون كە لە تیپەكانی پێشتر ئەندام بوون و بەشداریی چالاكیی هونەریان كردبوو، ئەو تیپە بەردەوام بووە لە چالاكی و چەندین بەرهەمیان پێشكەش كردیە، لە 24/6/1972ش لقی هەولێری (كۆمەڵەی هونەر و وێژەی كوردی) مۆڵەتی كاركردنی پێدرا، چەندین گۆرانیبێژ لەو تیپەی ئەندامی سەرەكیی بوون، وەكو: سابیر عەبدولڕەحمان (ئەكتەر)، یەحیا مەرجان، چەتۆ حەسەنیش وەكو ژەنیاری ئۆكۆردیۆن، یەكەم سەرۆكی ئەو تیپەی سابیر عەبدولڕەحمان بوو، ئەو تیپە لە ماوەكی كورتدا تانی چەندین ئاهەنگی گۆرانی و مۆسیقا لە ناو شاری هەولێرێ و شارۆچكەكانی دیكەی كوردستان پێشكەش بكات، لەناو ئەو تیپەدا ئەم گۆرانیبێژانە بەرهەمیان پێشكەش دەكرد: قادر زیرەك، محەمەد جەزا، ئەكرەم خامۆش، شەوكەت تۆفیق، جەعفەر بەرزنجی، ڕەحمان قوربانی و وریا ئەنوەر، تاوەكو ساڵی 1973 (14) ئاهەنگی گۆرانی و مۆسیقایان لە هۆڵی گەل، شارۆچكەی عەنكاوە، شەقڵاوە، مەسیف سەڵاحەدین، گوێڕ، مەخمور، شارۆچكەی دیبەگە، گوندی قورشاغلو و شاری سلێمانی پێشكەش كردووە.