ژنە كۆیییەكی تەمەن 62 ساڵ، نزیكەی نیو سەدەیە لە كارگەی مافووری كۆیە كار دەكات، ساڵەكانی سەرەتای كاركردنی بە عەشقەوە دەگێڕێتەوە كە چۆن شەوانە ئۆقرەی نەدەگرت تا ڕۆژ هەڵبێتەوە و بەیانییەكەی بچێتەوە سەر كارەكەی، ئێستاش دڵتەنگە بەوەی كۆتایی بەو ماوە درێژەی كاركردنی دێت و خانەنشین دەبێت.
پەیمان ئەبوبەكر ساڵی 1963 لە كۆیە لەدایك بووە، لە 1979 لە كارگەی مافووری شارەكە كار دەكات، لە دیدارێكی (گڵكەند (دا باسی جاران دەكات كە چەند كارەكەی خۆشویستووە، هەرچەندە كارەكەی وەك چنینی مافوور قورس بووە، بەڵام ئەوكات كچێكی گەنج و بەتوانا بووە، بە حەز و ئارەزووەوە ڕۆژانی كاركردنی خۆی لەناو كارگەكەدا بەڕێ كردووە.
پەیمان خان دەڵێ "یەكەم جار لە شازدە ساری وەك شاگرد لە كارگە دامەزرام، دوایێ كرامە كرێكاری بەرهەمهێنان، هەموو قۆناغەكانم لەناو كارگە بڕی، ئێستاش بەرپرسی كۆگام". ئەو هەموو ڕۆژێ لە كاتژمێر هەشتی بەیانییەوە تا دوو و نیوی دوای نیوەڕۆ لە دەوام بووە، دوای ئەوەش دەچووە قوتابخانەی (نەهێشتنی نەخوێندەواری) و تا شەشی سەرەتاییی تەواو كردووە. باسیش لەوە دەكات كە سەرەتا مووچەكەی چوار دیناری عێراقی بووە و چونكە رۆژانەش ئیشی زیادەیان هەبوو، بە زیادەی مووچەوە هەندێك مانگ هەشت، نۆ دیناری وەردەگرت، دەشڵێ (ئەوكات بە پارەی مووچەكەم زێڕم دەكڕی، هێشتا بەشێك لە زێڕەكانم ماون).
هەروەها باسی كارگەی مافووری كۆیە دەكات كە لە سەرەتای دەستبەكاربوونی ئەودا، 300 كارمەندی ئافرەتی لێ بووە، نیوەڕۆیان لەوێ خواردن ئامادە كراوە و هەر بۆنەیەك هەبوایە هەمووان بەیەكەوە بەشدارییان دەكرد و كۆمەڵگەیەكی بچووكیان بۆ خۆیان دروست كردبوو، بەڵام ئێستا تەنها 30 كارمەند لەوێ ماون، زۆربەی ئەوانی تر خانەنشین بوون و كارمەندی نوێش دانەمەزراون، بەم هۆیەوە ئێستا كارەكانی كارگەكە بە سستی بەڕێوە دەچن.
ئەو كارمەندە دێرینەی كارگەكە بەهۆی لێهاتوویی و ئەزموونی لە كارەكەی، چەندین جار بانگهێشت كراوە بۆ شارەكانی كوردستان تا سەرپەرشتیی دامەزراندن و كردنەوەی كارگەی چنین بكات، بەڵام دڵتەنگە بەوەی شوێنی كاركردنی جارانی دوا كەوتووە و هیوای دەخواست ئەو كارگە بەناوبانگەی شارەكە لە جاران باشتر بێت و پیشەسازییەكەیان زیاتر برەوی پێ بدرێت. پێشنیازیش دەكات حكوومەتی هەرێمی كوردستان گرنگیی زیاتر بەو كارگەیە بدات لە چوارچێوەی گرنگیدان بە بووژاندنەوەی كەرتی پیشەسازی لە كوردستاندا، وەك خۆی دەڵێ سلە كۆتاییدا قازانجەكە بۆ هاووڵاتییان و دەوڵەتیشەز.
سەبارەت بە بەرهەمەكانی كارگەكەش، خاتوو پەیمان باس لەوە دەكات كە بەرهەمی مانگانەی نزیكەی (100) مەتر بووە، ئەگەر مەترێكی كەم بوایە لە (100) مەتر ئەوا هەڕەشەی سزادانیان لێ دەكرا، بۆیە ئەوانیش هەوڵیان دەدا بەرهەمەكانیان بگەیەننە (100) مەتری تەواو، هەروەها كاتێك بەرهەمیان زیاد بوایە پاداشت دەكران، دەشڵێ "كە مافوورەكان تەواو دەبوون، لە هۆڵەكە دەمانپێوانەوە، داخوا چەند مەترە و لەسەر پارچە قوماشێكی سپی، درێژی و پانییەكەمان دەنووسییەوە، لەژێریشەوە دەماننووسی معمل سناف العراق - كویسنجق".
پەیمان ئەبوبەكر بە شانازیشەوە ئاماژە بەوە دەدات كە بەهۆی ئەوەی بەرهەمی كۆیە لە بەرهەمی زۆربەی شارەكانی تر جوانتر بوو، لە بەڕێوەبەرایەتیی هەولێرەوە پێیان گوتوون نابێ بنووسن كویسنجق، بەڵكو با هەمووی تێكەڵ بێت، دەنا بەم شێوەیە كار دەكاتە سەر بەرهەمەكانی كارگەكانی دیكەی ناوچەكە، بۆیە ناچار بوون ناوی كویسنجق لێ بكەنەوە، تا دوای ڕاپەرین دووبارە دەستیان كردەوە بە نووسینی ناوی بەرهەمی مافووری كۆیە.
جاران ئەو كارگەیەی كۆیە مافووری جۆراوجۆری بەرهەم دەهێنا، بەڵام ئێستا بەرهەمی كەمتر بووەتەوە، لە هەمان كاتیشدا هەندێك جار لەسەر داواكاریی خەڵك، مافوور بە وێنەی ئاڵای كوردستان یان وێنەی كەسایەتییەكان دەچنن، ئەمەش سەرەڕای ئەوەی كارەكانیان بەسستی بەڕێوە دەچێ و مانگانە تەنها چەند مەترێك بەرهەمیان هەیە.
كارگەی مافووری كۆیە بۆ پەیمان ئەبوبەكر ماڵێك بووە، هیچ كات ئامادە نەبووە بەجێی بێڵێ، هەرچەندە وەك خۆی باسی دەكات چەندین جار بەهۆی ئەو كارگەیەوە نەخۆش كەوتووە و جاری واش هەبووە لە زۆر شوێنی باش دەرفەتی بۆ ڕەخساوە، بەڵام هەر كارگەكەی خۆی پێ باشتر بووە. دەشڵێ چەند مانگێكی ماوە بۆ خانەنشین بوون، ئەوكات بە ناچاری دەچێتەوە ماڵ و واز لە كارەكەی دێنێت، بەڵام ڕەنگە درێژە بە كارەكەی بدات لە شوێنی تر، ئاواتیش دەخوازێ هەموو ژنێك كاری خۆی هەبێت، تەنانەت ئەگەر دەوڵەمەندیش بن، پەیمان ئەبوبەكر دەڵێ (كار بۆ ژن گەنجینەیە).
كارگەی مافووری دەستكردی كۆیە لە 1\5\1971 كراوەتەوە، ئێستا دەكەوێتە ناوەندی شاری كۆیە، تا ئێستاش كارگەكە كراوەیە و چەند ژنێك كاری تێدا دەكەن، لە ساڵانی هەشتاكانی سەدەی ڕابردوودا چەند هۆڵێكی بۆ زیاد كرا و نۆژەن كرایەوە، دەنا بە گشتی كارگەكە بەشێوەی جارانی و وەك خۆی ماوەتەوە.
