ئێوارەی هەینییە، بە ڕیشێكی سپی و ڕانك و چۆغەیەكی نوێوە ئۆتۆمبێلە مارسیدسە كۆنەكەی لێدەخوڕێت، بە تاسەوە دەڵێ كاتێ ئەوە لێدەخوڕم، وا دەزانم گەڕاومەتەوە تەمەنی لاوی.
مام توفیق، تەمەنی 60 ساڵە و تازە ئۆتۆمبێلێكی مارسیدسی مۆدیل 1967ی كڕیوە، ئێوارانی هەینی پیاسەی شەقامەكانی ناو هەولێری پێ دەكات.
نزیكەی 10 ساڵە هاوردەكردنی ئۆتۆمبێلی كلاسیك بۆ هەرێمی كوردستان دەستی پێ كردووە، كڕیارانی ڕۆژ لە دوای ڕۆژ پتر دەبن، بەم هۆیەوە حكوومەتی هەرێمی كوردستانیش ڕێنمایی بۆ ڕێكخستنی هاوردەكردنی ئەم ئۆتۆمبێلانە دەرکردووە.
توانا ڕواندزی كە پارێزەرێكی گەنجە، كۆمەڵە فایلێكی بەدەستەوەیە و لە بەرێوەبەرایەتیی گشتیی گومرگ لە وەزارەتی دارایی و ئابووریی مامەڵەی ئۆتۆمبێلە کلاسیکەکان رایی دەكات، پێی وایە "داروبەرد ڕوویان لە كڕینی ئۆتۆمبێلی كلاسیك کردووە"، بە تایبەت لە ماوەی دوو ساڵی ڕابردوودا سەدان مامەڵەی ئۆتۆمبێلی كلاسیكی بەڕێ كردووە.
توانا تەلەفۆنێكی بۆ دێت و وەڵامی كابرایەك دەداتەوە "وا خەریكە مامەڵەكانت تەواو دەكەم"، ئاوڕێك دەداتەوە و دەڵێ ئەوە خواپێداوێكی هەولێر بوو، مامەڵەی ئۆتۆمبێلێكی لای ئەوە و دەیەوێ زوو بۆی تەواو بكات، چونكە ئاهەنگی هاوسەرگیرییان هەیە و دەیانەوێ بەو ئۆتۆمبێلە بووكەكەیان بگوازنەوە.
لەبەردەم خانووێكی گەڕەكی ڕاپەرینی شاری هەولێر، چەند ئۆتۆمبێلێكی كلاسیك ڕاگیراون، خاوەنی ئەم ئۆتۆمبێلانە كوڕێكی گەنجە بە ناوی محەمەد بەیات، زۆربەی ئۆتۆمبێلەكان لە جۆری مارسیدسن و مودێلیان لە نێوان 1966 و 1978ە.
محەمەد خەریكە قسە لەبارەی ئۆتۆمبێلە كلاسیكەكانی دەكات، گەنجێك بەوێدا تێدەپەڕێ و داوای رووخسەتی لێ دەكات تا وێنەیەك لەگەڵ یەكێك لە ئۆتۆمبێلەكان بگرێت، ئەویش بە زەردەخەنەوە دەڵێ منیش هەر ئەوەم دەوێ، وێنە لەگەڵ ئۆتۆمبێلەكانم بگرن.
بە قسەی ئەو گەنجەی هەولێر، بە گشتی ئەوانەی ئۆتۆمبێلی كلاسیك دەكڕن، ئەوانەن كە حەزێكی تایبەتیان بۆ ئەم ئۆتۆمبێلە كۆنانە هەیە، هەندێكیش بۆ جوانكاری و راگرتن دەیانكڕن، كەسانێكیش بۆ مامەڵەكردن و قازانج.
هاوردەكردنی ئۆتۆمبێلی كلاسیك كێشە و سەرئێشەشی هەیە، سەرهەنگ ئەحمەد پێشانگای ئۆتۆمبێلی هەیە و ئۆتۆمبێلێكی كلاسیكی بۆ راکێشانی کڕیار نمایش كردووە، باسی لەوە کرد كە بەهۆی ئەم ئۆتۆمبێلەوە، دەیان كڕیاری ئۆتۆمبێلی ئاسایی دەچنە ناو پێشانگەكەی، بەم شێوەیە نمایشكردنی ئۆتۆمبێلی كلاسیك بووەتە ڕێگەیەك بۆ سەرنجڕاكیشانی کڕیاران.
سەرهەنگ بەدەم تەماشاكردنی ئۆتۆمبێلە كلاسیكەكەیەوە دەڵێ راستە شتێكی دەگمەن و جوانە، بەڵام ئامۆژگاری كەس ناكەم بیكڕێت، چونكە كێشەیان زۆرە و هەندێك لەو ئۆتۆمبێلانە كۆمپانیای دروستكەریان نەماوە و كەلوپەلیان دەست ناكەوێ، هەندێك جاریش بەهۆی كۆنیی ئۆتۆمبێلەكانەوە، ژمارەی لاشەكانیان كاڵ بووەتەوە، بۆیە لە دەروازە سنوورییەكان تووشی كێشە دەبن و دەگەڕێندرێنەوە.
خەڵكانێك هەن بۆ پیشاندانی دەوڵەمەندی، ڕوو لە كڕینی ئەو ئۆتۆمبێلە كلاسیكانە دەكەن، دارا موشیر توێژەرێكی ئابوورییە پێی وایە دەوڵەمەند بۆ پیشاندانی سەروەت و سامانی خۆی، زۆر ڕێگە بەكار دێنێت، یەكێك لەو رێگانە كڕینی ئۆتۆمبێلی كلاسیكە. دەشڵێ بە گشتی خەڵكی ئاسایی كەمتر توانای كڕینی ئەو جۆرە ئۆتۆمبێلانەیان هەیە، چونكە ئەو ئۆتۆمبێلانە لە وڵاتی سەرچاوەوە نرخیان گرانە، پارەی گومرگ و گواستنەوەیشیان دێتە سەر، دوو هێندەی تر گران دەبن.
ئەو توێژەرە هۆكارێكی دیكەی کڕینی ئەو ئۆتۆمبێلانە بۆ ئەوە دەگەڕێنێتەوە، کە ڕەنگە خەڵكانێك لە تەمەنی گەنجیدا ئارەزوویان كڕینی ئۆتۆمبێل بووە، بەڵام نەیانتوانیوە بیكڕن، ئەو ئارەزووەش لەگەڵ تەمەنیان گەشەی كردووە و بووەتە مەراقێك لە دڵیان، بۆیە كاتێك دەبنە پارەدار، بەدوای ئەو ئۆتۆمبێلانەدا دەچنەوە كە سەردەمێك حەزیان كردووە بیكڕن و نەیانتوانیوە.
بەپێی ڕێنماییەكانی حكوومەت، بۆ هاوردەكردنی هەر ئۆتۆمبێلێکی كلاسیك، سەرەتا رەزامەندیی وەزارەتی ناوخۆی دەوێ و کۆمەڵێك مەرجیشی هەیە، لەوانە، تەمەنی ئۆتۆمبێلەكە 40 ساڵ زیاتر بێت و ژمارەی لاشەی ڕەسەن بێت و بەڵگەنامەی رەسەنی ئەو وڵاتەی هەبێت كە لێی هاوردە كراوە و بەڵێنامەیەكیش لە خاوەنی ئۆتۆمبێلەكە وەردەگیرێت، كە مافی هیچ كەسی بەسەرەوە نییە.
