تەنیا لە هەولێر حەفتسەت شاعیر هەن. لەو بەریتانیا گەورەیە، تەنیا ١٨٠ شاعیر هەن. لەو یابانە، تەنیا سێسەت شاعیر هەن، بە هایکۆچی و تانکاچیشەوە.
ڕەنگە لە کوردستان، زیاتر لە دوو هەزار شاعیر هەبن. ئەوجە لەو سەین و بەینەدا، دەگەمە ئەو ئەنجامەی هەر وڵاتێک شاعیری زۆر بێت، وڵاتێکی دواکەوتووە. بنۆڕە سۆماڵ و ئەفغانستان و زیمبابۆی، شاعیر کراشەی دەکات.
ئەدی فەیلەسووف و نووسەر و ڕۆژنامەنووس و ڕۆماننووس؟ چەندمان هەیە؟ تەنیا لە دهۆک، سی و دوو ڕۆماننووس هەن! بێتو جەردێک بکەین، ڕەنگە لە کوردستان سەت و پەنجا ڕۆماننووس هەبن، بەڵام تەنیا هەشت یان نۆ ڕۆماننووسی پڕۆفێشناڵ هەبن. ئەمە ڕاستە بۆ شاعیر و ڕۆژنامەنووس و نووسەر و چیڕۆکنووسیش.
کورد گۆتەنی زۆر و بۆر. ئەرێ لۆ وایە؟ لۆ ئەو هەموو نووسەرەمان هەیە؟
کاتی خۆی کە ڕەشپێستەکانیان لە ئەمەریکا دەچەوساندەوە، خوی خۆیان دایە وەرزش و هونەر. باشترین یاریزانی باسکە و باشترین هونەرمەندی ئەمەریكایان لێ دەرچوو. لە عێراق، کە کوردیان دەچەوساندەوە، خوی خۆیان دایە نووسین. شیعر بووە پەناگە و ئارامگە بۆ دەربڕین و بەتاڵکردنەوەی هەناو. لەوەدا لاریمان نییە.
بەڵام ئێستە گرفتەکە چییە؟
تاک ئازادە هەرچی بێت. با بە کەیفی خۆی بنووسێت، بەس ئەو کاتە دەبێتە گرفت و خەم، بابای شاعیر، ڕۆماننووس یان ڕۆژنامەنووس وەهمێکی لۆ دروست بێت، پێی وا بێت عاسمان کون بووە، ئەوی لێ بەربوویتەوە. پێی وابێت بەشیعر و نووسینەكانی خزمەتی نیشتمان دەكات و دەبی كوردستان مەمنوونی بێت لە بەرانبەر بەخششەكانی.
لە لایەكی دیكەوە هەموویان پێیان وایە باشترین شاعیرن، باشترین ڕۆژنامەنووس و باشترین ڕۆماننووسن. ئەوەیە سیفەتی کۆمەڵگەی دواکەوتوو، تاکەیلی پێیان وایە زۆر موهیمن و هیچیش نین. ئەو وەهمە وا خەریکە کورد دادەڕمێنێت. وشەی «نازانم» لە فەرهەنگی کورددا نییە، هەمووی پێی وایە هەموو شتێک دەزانێت، پێی عەیبە بڵێت نازانم.
بریا خەمەکە هەر شاعیر و ڕۆماننووس با. خەمی ئەو هەموو ڕۆژنامەنووسە نەدیتکە و نەزانە، خەمێکی گەورەیە. ئەدی ئەو هەموو شرۆڤەکارە؟ ئەو هەموو پاڵەوانە فسۆڵەی سۆشیال میدیا؟ ئەو هەموو فەیلەسووف و قسە زلانە. ئەو هەموو ڕۆشنبیرە بیرکۆرە. نالی گوتەنی ئەمانە هەمووی (گوو لە ئاوکەر)ن. کۆمەڵگە بەرەو هەڵدێر دەبەن. نەبن چێترە.