دەوڵەتی عێراق کەسوکاری شەش هاووڵاتی دوور دەخاتەوە، بەهۆی ئەوەی بوونەتە پێشمەرگەی شۆڕشی ئەیلوول. بەپێی نووسراوێکی (زۆر نهێنی)، کە فەرماندەییی هێزی مەیدان ڕۆژی 10/3/1966 بۆ موتەسەڕیفیەتی لیوای هەولێری ناردووە، داوای دوورخستنەوەی کەسوکاری شەش پێشمەرگە بۆ ناوچەکانی ژێر دەسەڵاتی شۆڕشی ئەیلوول، دەکات. بڕیارەکە بۆ «پێویستییەکانی بەرژەوەندیی گشتی و ئاسایشی ناوچەکە» دەرکراوە، گوایە کەسوکاری ئەو شەش پێشمەرگەیە مایەی هەڕەشەن بۆ سەر ئاسایشی ڕژێمی ئەو کاتی عێراق و وێنەیەکی نووسراوەکەش بۆ دوو فیرقەی سوپا، دەزگای هەواڵگری، پۆلیس، ئەمنی عامە و قایمقامیەتی کۆیە نێردراوە. ناوی پێشمەرگەکان و کەسوکارە دوورخراوەکانیان: - پێشمەرگە دڵشاد واحید ساڵح باوکی و حەبیبە مستەفای دایکی و قومریەی خوشکی بڕیاری دوورخستنەوەیان دراوە. - پێشمەرگە فاروق جەمال وەهاب باوکی و ڕەحمە حاجی ئیسماعیلی دایکی و سامیی برای کە بەرگدوور بووە، بڕیاری دوورخستنەوەیان دراوە. - پێشمەرگە سەباح کاک ساڵح باوکی و فاتیمە مەجیدی دایکی بڕیاری دوورخستنەوەیان دراوە. - پێشمەرگە عومەر عەبدوڵڵا باوکی و ئامینە عەبدوڵڵای دایکی و حوسێن و بەکری برای، بڕیاری دوورخستنەوەیان دراوە. - پێشمەرگە فوئاد ڕەزا باوکی و جەمیلە حوسێنی دایکی بڕیاری دوورخستنەوەیان دراوە. - پێشمەرگە زاهیر عەلی باوکی و عایشەی دایکی و تاهیری برای بڕیاری دوورخستنەوەیان دراوە.