سەرەتای ئەم مانگە ژنێكی کریستیانی عەنکاوە دوای گەشتێکی 37 ڕۆژە بەپایسکل لەگەڵ هاوژینە ڕووسییەکەی لە ئەڵمانیاوە گەیشتنەوە هەولێر، ئەو کە بە پایسكیل چەندین وڵات گەڕاوە، دەڵێت عەنکاوە و هەولێر لە هەموو شارەكانی دنیا خۆشترن.
ئیڤا سڵێوە بەیتوون (تەمەن 53 ساڵ)، كە ئێوارەی ڕۆژی سێی ئەم مانگە لەگەڵ جۆرج سباتەری هاوژینی گەیشتنەوە زێد، یادگاریی زۆری لە عەنکاوە هەیە و لە تەمەنێکی بچووکەوە شەیدای یاریی تۆپی بالە و تۆپی سەرمێز بووە، بۆیە هەركە گەڕاوە سەردانی یانەی ئەکادی شارەكەی كرد.
قۆناغەکانی خوێندنی سەرەتایی و ناوەندی و دواناوەندیشی لە عەنکاوە تەواو کردووە، لە سەرەتای نۆهەتەكانی سەدەی ڕابردوو کوردستان بەجێ دێڵێت و ڕوو دەکاتە ئەڵمانیا، لە شاری ئوسنا بروک نیشتەجێ دەبێت و هەر لەوێش هاوسەرگیری دەکات.
ئیڤا دوای گەیشتنی بەعەنكاوە بۆ (گڵکەند) گوتی «گەشتەکەم زۆر دوور و درێژ بوو، بەڵام تامەزرۆی گەیشتن بەعەنكاوە بۆی ئاسان كردم، هاوسەرەکەشم هاندەرێكی باشم بوو تا بگەمەوە شوێنی یادگارییەکانم و منداڵیم“.
ئەو كە پێشوەختە بڕیاری دابوو یەکەم وێستگەی لە هەولێر سەردانیکردنی یانەی ئەکادی کچان بێت کە یەکێکە لە یانە بەناوبانگەکانی تۆپی بالە و لە پاڵەوانەکانی کوردستانە. پێشوازیکردنی گەرمی خەڵک لە ئیڤا لە پێش ئەو یانەیە سەرسامی کردووە، لەم بارەوە دەڵێت ”یانەکە ڕێزیان لێ ناوە و هەرگیز ئەوەی لە بیر ناچێتەوە“.
لە بارەی گەشتەکەشیەوە باس لەوە دەكات كە لە ژیانی خۆیدا گەشتی زۆری بە پایسکل کردووە، فەڕەنسا، هۆڵەندا، بەلجیکا و وڵاتانی دیکە گەڕاوە، بەڵام ”بۆ من ئەم گەشتە هەستێکی تایبەتی هەبوو، بۆیە ماندووبوون و شەکەتی و دوورودرێژیی گەشتەکە ڕای نەگرتم و ساردی نەکردمەوە“.
بەگوتەی ئەو، شوێن و مەنزڵگە و یادگارییەکانی و کوچە و کۆڵانەکانی عەنکاوە ئەوە دەهێنێت لە پێناویدا ماندوو بێت، دەڵێت «هەموو شتێکی جارانم لە یاد ماوەتەوە و چێژی تایبەتیان بۆ من هەیە“.
ئەو ژنە كریستیانە زۆر خۆشحاڵە بەبینینی پێشكەوتنی گەورەی هەولێر لە هەموو ڕووەكانەوە و ئاماژە بەوە دەكات ”هەرێمی کوردستان زۆر هێمن و ئارامە، زۆر پێشکەوتووە. بەئومێدم هەولێر و عەنكاوە زیاتریش گەشە بكەن“. تکاش دەكات حكوومەتی هەرێمی كوردستان بایەخی زیاتر بە سروشت بدات و وڵات سەوزتر بكرێت.
ئیڤا كە بۆ گەیشتن بەهەولێر 4500 کیلۆمەتری بڕیوە، هەروەها بە ژمارەیەک وڵاتدا تێپەڕیوە لەوانە چیک، هەنگاریا، نەمسا، سڕبيا، بولگاریا، یۆنان و تورکیا. بڕیاری داوە ماوەی 10 ڕۆژ لە هەولێر بمێنێتەوە، سوپاسی خەڵکی کوردستان و هەولێر دەکات کە پێشوازییەکی گەرمیان لێ کردووە.