“ئێستەش بێ عەبا ناچمە دەرێ”
لە كۆڵانەكی كۆنی هەولێرێ، كە یەكسەر هەست دەكەی کات ھێواشتر دەڕوات، ھێشتا ژنێک بە تەنھا لەبەر دەرگە دانیشتووە، دەڵێی شوێنەوارێكی مێژووییی زیندووە و چاوەڕێی گۆڕانی قەدەر و گەڕانەوەی تەمەن دەكات.
ئەو ژنە وێنەیەکی زیندووی ھەولێری فرە كولتوورە، کە سەردەمی نوێ نەیتوانیوە نە تەنهایییەكەی و نە تایبەتمەندییەكانی بسڕێتەوە.
هەر وەختەك بە كۆڵانی عارەبانی هەولێرێدا تێپەڕی، لەبەر دەرگەی خانووێكی كۆنی بچووكدا، ژنێكی بەتەمەنت دێتە به‌رچاو، كە هەندێك جار ورتە ورتێكی لێوە دێت، سەرباری ئەوەی بە چوار زمان قسە دەكات، كەس ناتوانێت لێی تێ بگات، مەگەر بە شەو لە تاو ئازاری چاوی بەهۆی چرای تیژی ئۆتۆمۆبێلەوە، دەنگی ناڕەزاییی لێ بەرز بێتەوە.
ئەو ژنە «ئەرپەنیك ئەرنەواس یەنووك»ە، تەمەنی خۆی بە تەواوی نازانێت و دەڵێت “پەنجا ساڵم»، بەڵام ڕاستییەكەی زۆر لەو تەمەنە گەورەتر دیارە. ئەو دەیان ساڵە لەو خانووە بچووكەدا دەژی؛ دەڵێت ”نازانم لە كەنگینێوە هاتینە ئێرە، ئەمە گچكە بووین، باب و داكم هەر لێرە بوون“.
ئەرپەنیك كە بەگەرمای هاوین و سەرمای زستان، به شەو و به ڕۆژ بەتەنیا لەبەر دەرگەی ماڵەكەی دادەنیشێت، لە باوكێكی ئەرمەنی و دایكێكی ئاشووری لەدایك بووە.
باوكی لە سەردەمی عوسمانییەكان هاتووەتە هەولێر، وەك خۆی باسی دەكات، لە خوشك و براكانی، تەنیا خۆی و برایەكی ماون، ئەویش لە ئەمریكایە، دەڵێ “خوشك و براكانی دیكەم بەقوربانی گۆ بوون، یەك برام نەبی، لە ئەمریكایە و خانییەكەمانی فرۆشتیتە دەورەمەندەكی هەولێرێ، بەس خوا خێری بنووسی، ئەمنی دەرنەكردییە و هێشتا لە خانییەكەی مایمەوە”.
ئەرپەنیك نازانێت مۆبایل بەكار بێنێت و دەڵێت جار جارە كە برایەكەی لە ئەمریكا دەگەڕێتەوە، سەردانی دەكات و دەیبینێت، دەنا لە مۆبایلی زیرەك نازانێت.
ئەو خانووەی ئەرپەنیك تێیدا دەژی، زۆر بچووكە، بە دەستووری كۆن لە كەرپووچ دروست كراوە، كە دەچیتە ژوورەوە، لای ڕاستت دەستشۆر و گەرماوە، لای چەپت ناندینە، حەوشەیەكی بچووك، دوو ژووریش لە بەرامبەرتن، جلوبەرگە کۆن و ڕەنگ مردووەكانی ئاوێتەی داری ناو دیوارە ترازاوەكانی ئەو كەلاوەیە بوون، كە ئەرپەنیك لە بیری چووەتەوە چەند ساڵە لێی دەژی، بەڵام بنمیچە كاریتەیییەكەی نیشانەی تەمەنی درێژی كەلاوەكەیە.
كۆڵانی عارەبانی هەولێرێ، مێژووەكەی بۆ سەدان ساڵ دەگەڕێتەوە، مزگەوتێكی لێیە تەمەنی ١٣٠ ساڵ زیاترە بەناوی مزگەوتی پاشە، جگە لە بوونی تەكیەیه‌ك و قشڵەی سواری و سەدان خانووی شوێنەواری، شێوەی تەلارسازییەكەیشیان بووەتە جێی سەرنجی شوێنەوارناسان، گەشتیاران و تەلارسازان.
ئەرپەنیك بە چوار زمان قسە دەكات، كوردی، سریانی، عەرەبی و توركی، بەڵام بەهۆی تەمەنی درێژ و نەخوێندەوارییەوە، بیرەوەرییەكانی لێ تێكەڵ بووە، نازانێت چ ساڵێك هاوسەرگیریی كردووە و چ ساڵێك هاوسەرەكەی مردووە، دەشڵێت ”كە تەیارە لە قەراتێی دا، ئەڵقەیان لە دەستم كرد، نازانم چ سارەك بوو، حیسابم لێ تێك چووە، بەس دەزانم كوڕم گچكە بوو، وەكی پیاوه‌كەم مرد. ئەمن وەكی كچی دیكەش نەبووم بچمە دەرێ و دنیایێ ببینم، ئێستەش بێ عەبا ناچمە دەرێ“.
ئەو ژنە، ماوەی پێنج ساڵە تاكە كوڕەكەی ماڵی لەگەڵ جیا كردووەتەوە، لە ناو بازاڕ لە نێزیك قەڵات چایچییە، شەوانە لە چایخانەكە سەردانی كوڕەكەی دەكات.
كوڕەكەی ئەرپەنیك بووەتە موسوڵمان و ژنێكی موسوڵمانی هێناوە، هەرچەند لای دایكی نییە، بەڵام خه‌رجی دایكی لە ئەستۆ گرتووە.
ئەو ژنە ئەرمەنییە ڕۆژانەی خۆی بەتەنیا بەسەر دەبات، خۆی بەناو ماڵەكەیەوە سەرقاڵ دەكات. شەوانەش چایەك له‌لای كوڕەكەی دەخواتەوە، وەك خۆی دەڵێ ”وەكی لە كن كوڕەكەم دێمەوە، نانەكی حازر دەكەم، دەخۆم و دەنووم“.
