ماوه‌ی دوو ساڵه سووچێكی گۆڕه‌پان و باخچه فراوانه‌كه‌ی په‌یمانگەی ته‌كنیكیی شه‌قڵاوه، نێودەوڵەتی و فەرمی خۆی دەنوێنێت، چونكە خوێندنی هونەرێكی جیاوازی تێدا كراوه‌ته‌وه، له‌گه‌ڵ چوونه ژوورەوەدا، مامۆستا و قوتابی و فه‌رمانبه‌ران له‌سه‌ر فه‌رشی سوور و به‌جلوبه‌رگی فه‌رمیی هاوشێوه‌ی شانده دیپلۆماته‌كان پێشوازیت لێ ده‌كه‌ن.
به‌شی پڕۆتۆكۆل و شیاندنی دیپلۆماسی، كە یه‌كه‌م جارە لە کوردستان دەکرێتەوە، تایبەتە بەپێگەیاندن و دابینکردنی توانا مرۆیییەکانی تایبەت بە ڕێوڕەسم و تەشریفات و بەرپرسایەتیی ڕێکخستنی چاڵاکییە فەرمییەکان لەگەڵ ڕێکخستنی سەردانە فەرمییەکان، هەروەها ڕاهێنانی قوتابیان لەسەر چۆنێتیی مامەڵەکردن لەگەڵ بەرپرسانی باڵا و شاندی وڵاتان و بۆنە نێودەوڵەتی و نێوخۆیییەکان بەپێی نەریت و پڕۆتۆکۆلە فەرمییەکان.
تا ئەم دوایییە لە بواری پرۆتۆكۆلەوە نەتواندرابوو كادیری ئه‌كادیمی لە هه‌رێمی كوردستان پێ بگەیەندرێت، بۆیه ساڵی ٢٠٢٣ لێژنه‌ی زانستیی په‌یمانگەی ته‌كنیكیی شه‌قڵاوه پڕۆپۆزەڵێکی لەم بارەیەوە پێشکێشی وه‌زاره‌تی خوێندنی باڵا کرد، پار بۆ یه‌كه‌م جار له خوێندنی به‌یانیان و ئێوارانیشدا قوتابی وه‌رگیران، ساڵی داهاتوو ده‌بن به یه‌كه‌م خولی ده‌رچوو و بڕوانامه‌ی دبلۆمیان پێ ده‌به‌خشرێت.
قوتابیانی به‌شەکەی شەقڵاوە به‌جلوبه‌رگی فەرمی و ڕێكپۆشیان له به‌شه‌كانی دیكەی په‌یمانگەكه جیا ده‌كرێنه‌وه، قوتابیان كراسی سپی و قاتی ڕه‌ش یان نیلی یان ڕه‌ساسی له‌گه‌ڵ ڕیباتی سوور، ماڕۆنی یان نیلی دەپۆشن، كچان ماكیاژی تۆخ و نینۆكی درێژ و بۆیەکراویان لێ قەدەغە کراوە، پێویستە لەسەر قوتابیانی بەشەکە گۆرەوی و پێڵاوی ڕەشیان لەپێدا بێت.
له باره‌ی دیاریكردنی شێواز و ناوه‌ڕۆكی وانه‌كانەوە، د. ڕزگار شەهاب سەرۆكی بەشەكە گوتی ”جیا له‌وه‌ی ڕاوێژ بەکەسانی پسپۆڕی بوارەکە و سوود لە به‌شی پرۆتۆكۆلی سه‌رۆكایه‌تیی هه‌رێمی کوردستان و په‌رله‌مان و فه‌رمانگه‌ی په‌یوه‌ندییه‌كانی دەرەوەی حكوومەتی هەرێمی كوردستان وه‌رگیراوه، سوود لە ئەزموونی کەسانی شارەزای بوارەکەش لە سەرۆکایەتییەکانی کوردستان وەردەگیرێت، هەروەها قوتابیانیش بۆ ئەو شوێنانە دەبردرێن“، مامۆستاكانی به‌شه‌كه‌ش بڕوانامه‌ی باڵایان له یاسا و په‌یوه‌ندییه نێوده‌وڵه‌تییه‌كاندا هه‌یه، كه بریتین لە یاریده‌ده‌ری پڕۆفیسۆر و شه‌ش دكتۆر و پێنج هه‌ڵگری بڕوانامه‌ی ماسته‌ر.
لە بەشەکەدا قوتابیان لە هه‌ر كۆرسێكی خوێندن پێنج بابەت بە هه‌ردوو شێوازی پراكتیكی و تیۆری ده‌خوێنن کە بریتین له چۆنیه‌تیی ئیداره‌دان و ڕێكخستنی ڕێوڕه‌سمەكان و چۆنیه‌تیی پێشوازیكردن لە میوان و زمانی جه‌سته و ئاماده‌كردنی كۆنفرانس و كۆبوونه‌وه‌كان، به‌گوتەی سه‌رۆكی به‌شەكە، له هه‌وڵی ئه‌وه دان خوێندنی به‌كالۆریۆسیش بكه‌نه‌وه و دواتر هه‌نگاو بنێن بۆ خوێندنی باڵا، ئاماژه به‌وه‌ش ده‌كات له ساڵانی داهاتوو وه‌رگرتنی قوتابی له به‌شه‌كه‌یان مه‌رجدار ده‌كرێت به‌چاوپێكه‌وتنی پێشوه‌خته، به‌رزیی باڵا و شێوه‌ی قوتابی له مه‌رجه‌كان دەبن هاوشێوه‌ی ئه‌كادیمیای سه‌ربازی.
دەرچووانی ئەو بەشە، لە سه‌رۆكایه‌تییه‌كان و فه‌رمانگه‌ی په‌یوه‌ندییه‌كانی ده‌ره‌وه، هه‌روه‌ها لەنێو ڕێكخراوه‌كان و هۆتێله گەورەكانیش دەرفەتی كاركردنیان بۆ دەڕەخسێت.
شه‌یما مامه‌ند، كچه قوتابییه‌كی ڕێكپۆشی ئەو بەشەیە ده‌ڵێت “به‌ته‌بیعه‌ت حه‌زم لە ڕێكخستن و ئیستقبال و به‌ڕێكردنی میوانه، لەو بەشە شتی زۆر فێر دەبم، بەس ئەمن پاش ده‌وامێش لە مارێ سوود لە تۆڕە كۆمەڵایەتییەكان و یوتیوب و فیلمەكان دەبینم لۆ فێربوونی زیاتر لەو مەجالە”.
ئەو كچە قوتابییە پێی وایە پڕۆتۆکۆل پەیوەندیی بە ڕێزگرتنەوە هەیە، چۆن وا لە خەڵک دەکەیت هەست بە بەها بکەن، ڕەنگە كورد لە ڕیزی پێشەوەی ئەو نەتەوانەی جیهاندا بێت كە بەمیواندۆستی و ڕێزگرتن لە میوان ناسراون.
یەكەم گرووپی قوتابیانی پڕۆتۆکۆل، لە دوای دەرچوونیاندا، چاوەڕێ دەكرێ ئەوەی وەک ئەزموونی ئەکادیمی لە شارۆچکەیەکی بچووکی شاخاویدا فێری بوون، لە هۆڵە نێودەوڵەتییەكان و مەراسیمە جیهانییەكاندا پەیڕەو بكەن.
پۆلێک قوتابیی پڕۆتۆکۆل، لە پەیمانگەی تەکنیکیی شەقڵاوە
