لە نزیک پردی سەیداوەی جەنجاڵەوە، کۆڵانێکی پڕ لە یادەوەری هەیە.
لێرە، لە (مەیدانی پایسکیلان)، ژیان بەخێرایییەکی جیاواز دەڕوات، دەنگی مامەڵەکردنی کڕیار و فرۆشیار، زرینگەی خولانەوەی تایەی پایسکیل و گڕەی ئەگزۆزی ماتۆڕسکیلان تێکەڵ بەیەکتر بوون.
پیاوێک بە سۆزەوە دەستی منداڵەكەی گرتووە و پایسکیلێکی نوێی بۆ هەڵدەبژێرێت، گەنجێک بە تاسەوە سەودای ماتۆڕسکیلێک دەکات کە لەمێژە خەونیەتی ببێتە خاوەنی، پیرەمێردێکیش بەدوای هۆکارێکدا دەگەڕێت هەم هاتوچۆی ئاسان بکات و هەم وەرزشێک بێت بۆ درێژکردنەوەی تەمەنی.
لێرە تەمەن، نەتەوە و زمان سنوور ناناسن، هەمووان لەناو ئەم قەرەباڵغییەدا سەرقاڵی کڕین و فرۆشتنن. بەڵام ئەم وێنە پڕ لە جووڵەیە، لە بەردەم گۆڕانکارییەکی گەورە دایە.

پڕۆژەیەک بۆ سیمایەکی نوێ
پێش چەند مانگێك، لە دیوانی پارێزگەی هەولێر، بەسەرپەرشتیی ئومێد خۆشناوی پارێزگار و ئامادەبوونی بەرپرسانی پەیوەندیدار، کۆبوونەوەیەک لەگەڵ ئەنجوومەنی بازاڕی پایسکیل و ماتۆڕسکیلان ئەنجام درا. ئامانجی سەرەکیی کۆبوونەوەکە، تاوتوێکردنی پڕۆژەی دروستکردنی بازاڕێکی هاوچەرخ بوو بۆ ئەم کاسبکارانە، کە هەنگاوێکە بۆ ڕێکخستنەوەی سیمای شار و کەمکردنەوەی جەنجاڵیی هاتوچۆ.
لە کۆبوونەوەکەدا، وردەکاریی پڕۆژەکە خرایە ڕوو کە بریتییە لە دروستکردنی بازاڕێکی مۆدێرن بە گوژمەی دوو ملیار و ٨٨٧ ملیۆن و ٥٧٤ هەزار دینار لەسەر ڕووبەری ١٠ دۆنم زەوی لە بەشی باشووری ڕۆژهەڵاتی شاری هەولێر، كە دەكەوێتە سەر جادەی کۆنی کەرکووک.
شوێنی ئێستەی بازاڕەکە کە کەوتووەتە جەرگەی شارەوە، بووەتە هۆی دروستبوونی قەرەباڵغییەکی زۆر و سیمایەکی ناوچەکەی ناشیرین كردووە.
بچووکیی دوکانەکان و تەنگیی کۆڵانەکە وایان کردووە زۆربەی کاسبکاران کاڵاکانیان لەسەر شەقام نمایش بکەن، ئەمەش جگە لەو کەسانەی بێ مۆڵەت و لەسەر شەقام مامەڵەی کڕین و فرۆشتن دەکەن، كە ئاستەنگی گەورەیان بۆ هاتوچۆی هاووڵاتیان دروست کردووە.
کارزان عەبدولهادی سەرۆکی شارەوانیی هەولێر، سەبارەت بەئامانجی پڕۆژەکە بە (گڵکەند)ی ڕاگەیاند ”دوای ئەوەی گلەییی ژمارەیەکی زۆر لە هاووڵاتیانمان پێ گەیشت سەبارەت بەجەنجاڵیی مەیدانی ماتۆڕ و پایسکیلان، بیرمان لە شوێنێکی شایستەتر و جێگرەوەیەکی سەردەمیانە کردەوە. بۆیە لەگەڵ پارێزگاری هەولێر، دوای چەندین گفتوگۆ، بڕیارمان دا کار بۆ دروستکردنی بازاڕێکی هاوچەرخ بکەین“.
سەبارەت بەشوێنی دروستکردنی بازاڕی هاوچەرخی پایسکیل و ماتۆڕسکیلان، سەرۆکی شارەوانیی هەولێر گوتی ”بازاڕەکە دەکەوێتە سەر ڕێگەی کەرکووک، بەدیاریکراوی لە شوێنە کۆنەکەی بەڕێوەبەرایەتیی هاتوچۆی هەولێر (دائیرەی مروری قەدیم) بەرانبەر کۆلێژی ئەندازیاریی هەولێر“.
ڕای جیاواز لەنێو بازاڕدا
لەنێو بازاڕە قەرەباڵغەکەدا، دەنگۆی گواستنەوەکە بووەتە باسی گەرمی کاسبکاران. بەشێکیان پێشوازی لەم هەنگاوە دەکەن و بەپێویستی دەزانن. باس لەوە دەکەن کە لە بێسەروبەری و جەنجاڵیی بازاڕەکە بێزار بوون و پێیان وایە شوێنێکی ڕێکخراو کەسابەتی ئەوانیش باشتر دەکات. بەڵام لە بەرانبەردا، نیگەرانی لە ڕووخساری بەشێکی دیکەی کاسبکاراندا بەدی دەکرێت. گلەیی لەو بڕە پارەیە دەکەن کە بۆ وەرگرتنی دوکانێک لە بازاڕە نوێیەکە دیاری کراوە. بەگوتەی ئەوان، داواکردنی نزیکەی ٢٤ بۆ ٢٥ ملیۆن دینار بۆ هەر دوکانێک، بارێکی قورسە و لە توانای زۆربەیاندا نییە.
سەبارەت بەم نیگەرانییانە، کارزان عەبدولهادی دڵنیایی دەداتە کاسبکاران بەوەی ”گلەیی و تێبینیی بەشێک لەو کاسبکارانەمان پێ گەیشتووە و کاریان لەسەر دەکەین. دڵنیایان دەکەینەوە هەموو هەوڵێک دەدەین بۆ ئەوەی هیچ زیانێک نەکەن و کەسابەتیان لە بەرچاو دەگیرێت“.

گرافیکی بازاڕە هاوچەرخەکە کە دەکەوێتە سەر ڕێگەی کۆنی کەرکووک