بە دیار نۆرەی بڕینی كەزییە درێژەكەیەوە، لەسەر کورسیی ئارایشتگەیەکی خانمان دانیشتووە، دەیبەخشێتە كچانی تووشبووی شێرپەنجە، ئەوانەی بەهۆی دەرمانەوە پرچیان هەڵدەوەرێت.
پڕۆژەیەکی خۆماڵی لە هەولێر كەزی كۆ دەكاتەوە، تا بەهاوكاریی دامەزراوەیەکی بەریتانی قژی دەستکرد (باروکە)ی لێ دروست بکات و بیبەخشن بەتووشبووانی شێرپەنجە لە هەرێمی کوردستان.

منداڵێک پرچی دەبەخشێت
بۆ ئیلیان جیڤارای تەمەن ١١ ساڵ، دەستبەرداربوون و بەخشینی بەشێک لە پرچی ئاسان نییە، بەڵام ناسینی پڕۆژەکە و دڵخۆشکردنی تووشبووانی شێرپەنجە و پشتیوانیکردنی دەروونییان بۆ ئەو ئامانج و مەبەستە سەرەکییەکەیە.
پووری ئیلیان کە لە نەخۆشخانەی نانەکەلی تایبەت بەشێرپەنجە لە هەولێر کار دەکات، هۆکاری بەستنەوەی ئیلیانە بە دڵخۆشکردنی تووشبووانی شێرپەنجە و ڕزگارکردنیان لە ئاڵنگارییە دەروونی و کۆمەڵایەتییەکان، ئیلیان بەدڵخۆشییەوە دەڵێت ”بڕیاری بەخشینی پرچم دا بۆ ئەوەی متمانە و دڵخۆشی و ژیانی ئاسایی بۆ تووشبووانی شێرپەنجە بەتایبەت منداڵ بگەڕێنینەوە، چونکە ئەوان بەهۆی هەڵوەرینی قژیانەوە دوای وەرگرتنی چارەسەری کیمیایی ڕووبەڕووی ناڕەحەتی و هەستێکی ناخۆش دەبنەوە“. پشتگیریی خێزان و نزیکەکانی لە بڕیارەکەی بۆ ئەو كچە منداڵە گرینگ بووە و داواش دەکات خەڵکی دیکەش بچنە پێشەوە لەو پڕۆژەیە.
پڕۆژەی (ویگز فۆر کیدز) لە لایەن چەند گەنجێکی خۆبەخشەوە بەڕێوە دەبرێت کە بەشێکیان لە نەخۆشخانەی نانەکەلی لە هەولێر کار دەکەن، قژی دەستکرد (باروکە) بەبێ بەرامبەر بە منداڵانی تووشبووی شێرپەنجە بەهاوکاریی دامەزراوەیەکی بەریتانی دەبەخشن، سەرەتا تەنیا باروکەیان دەهێنا، ئێستە قژ لە کەسانی بەخشەر وەردەگرن بۆ ئەوەی باروکەی لێ دروست بکرێت، دوو خانمیش پاڵەوانی چیڕۆکەکەن.
ئیمێڵێک ژیانی دەیان کەس دەگۆڕێت
«ویگز فۆر کیدز»، یان «باروکە بۆ منداڵان»، نزیکەی چوار ساڵ دەبێت ژمارەیەک خۆبەخش کاری تێدا دەکەن و تەنیا خەمی ئەوان بەخشینی دڵخۆشی و گەڕاندنەوەی متمانەیە بەهاوکاریی کەسانی بەخشەری قژ، نزیکەی ١٠ کەس لە پڕۆژەکەدا کار دەکەن، هەمووشیان خۆبەخشن، تەنانەت کۆمپانیای گەیاندن و گەڕاندنەوەش لە بەریتانیاوە خۆبەخشانە هاوکارە.
دکتۆرە ئیمان ئیبراهیم ساڵانێکە لە نەخۆشانەی نانەکەلی خۆبەخشە، خاوەنی بیرۆکە و دامەزرێنەری کۆمەڵەکەیە، ساڵی ٢٠٢٢ کە بۆ خوێندن لە بەریتانیا بووە، ئیمێڵێک بۆ دامەزراوەی «Little Princess Trust» دەنێرێت، ئەمەش بەمەبەستی هاوکاریکردنی منداڵانی کوردستان بەدروستکردنی باروکەی بێ بەرامبەر، وەڵامی دامەزراوەکە دڵخۆشکەر دەبێت و پڕۆژەکە دەست پێ دەکات و ژیانی دەیان کەس دەگۆڕێت. دەڵێت ”دوای توێژینەوە دەرکەوت تووشبووانی شێرپەنجە بەتایبەت منداڵان بەدەست لەدەستدانی متمانەوە دەناڵێنن دوای هەڵوەرینی پرچیان، لە هەرێمی کوردستانیش شوێنێک بۆ دروستکردنی باروکە نەبوو، بۆیە لەگەڵ ژمارەیەک دەزگە و دامەزراوە قسەم کرد و ئەو دامەزراوەیە ڕەزامەند بوو، سەرەتا قژەکەش لە خۆیان بوو، بەڵام دواتر قژی خۆبەخشانم کۆ کردەوە و ئاسانکاریمان بۆ کردن“.
ئەو پزیشکە لە ڕێگەی پڕۆژەکەیەوە و ساڵانێک کاری خۆبەخشییەوە لە نەخۆشخانەی نانەکەلی تایبەت بەتووشبووانی شێرپەنجە هاوشێوەی دەیان کەسی دیکە جێ دەستی دیارە.
لەگەڵ ئەو پزیشکە عائیشە عومەر سەرپەرشتیاری پڕۆژەکەیە هاوشێوەی هاوڕێیەکەی هەشت ساڵ دەبێت لە نەخۆشخانەی نانەکەلی خۆبەخشانە کار دەکات، دەڵێت ”پڕۆژەکەمان متمانەی بۆ زۆر منداڵ گەڕاندووەتەوە، ئێستە درێژە بەژیان و خوێندن دەدەن بەبێ ئەوەی هەست بە کەمی بکەن، چونکە باروکەکان تەواو لە قژە سروشتییەکەی پێشتریانەوە نزیکە، ئەوەش بۆ ئێمە شانازییە“.

ڕێگەی سەرکەوتن قۆناغی قورس دەبڕێت
پڕۆژە خۆبەخشییەکە قۆناغی سەختی بڕیوە، خۆبەخشەکان زۆر جار لە گیرفانی خۆشیان پارەیان بۆ سەرخستنی تەرخان کردووە، بەڵام ئێستە ژمارەیەکی زۆر خۆبەخش ئامادەیییان بۆ بەخشینی قژیان دەربڕیوە.
ئەو پرچانەی دەبەخشرێن ناو و ڕەنگ و درێژی و قەبارەی و وردەکاریی دیکەشی لەسەر دەنووسرێت، وەکو لایەنی سوودوەرگرتوو لێی، هەروەها پێویستە لە ١٧ سانتیمەتر کورتتر نەبێت، نابێت لە کاتی بڕینیدا بۆیەی پێوە بێت، باشتریشە قژەکە لەو ڕەنگانە بێت کە باون، سەرباری ئەوانەش نابێت پێنج ساڵ بەسەر بڕینیدا تێپەڕیبێت، وەکو ئەوەی دکتۆرە ئیمان ئیبراهیم دەیڵێت.
سەرپەرشتیاری پڕۆژەکە ئەوەش باس دەکات بارۆكە دروستکراوەکان لە جۆری سروشتی و باشترین کوالیتییە نەوەک بازرگانی، زیانی بۆ سەر نابێت و هەستیاری بۆ پێستی دروست ناکات و بێ بۆنیشە.

دیارییەکی بەنرخ بەبێ بەرامبەر
دکتۆرە ئیمان ئیبراهیم، خاوەنی بیرۆکەی پڕۆژەکە دەڵێت ”تێچووی هەر باروکەیەک دەگاتە هەزار دۆلار، بەڵام بەبێ بەرامبەر دەبەخشرێت“.
تاوەکو ئێستە زیاتر لە ٧٠ تووشبووی شێرپەنجە لە پڕۆژەکە سوودمەند بوون، ئەو کەسانەشی داوای باروکە دەکەن و ئەوانەشی ئامادەیییان بۆ بەخشینی قژ هەیە لە زیادبووندایە، پڕۆژەکە هەژمارێکی بەناوی «wigs4kids.kri» لە ئینستاگرام بۆ پەیوەندیکردن هەیە.
پڕۆژەکە دڵخۆشیی خستووەتە ناو ئەو خێزانانەی بەهۆی تووشبوویەکی شێرپەنجەوە گیرۆدەن، عائیشە عومەر لەم بارەیەوە دەڵێت ”ژن و مێردێکمان لە جیابوونەوە ڕزگار کرد، دوای تووشبوونی ئافرەتەکە بە شێرپەنجە، پیاوەکە ئامادە نەبوو هاوژینەکەی بەبێ پرچ ببینێت و لە دۆخێکی خراپدا بوو، بەڵام دوای باروکەکە ئێستە گەڕاونەتەوە وەکو دوو خۆشەویست ژیان دەکەن، لە کاتێکدا لە جیابوونەوە نزیک بوون“.