لە منداڵییەوە، بەكۆكردنەوەی بەردی ڕەنگاوڕەنگ لە ناو سروشتی كوردستان دەستی پێ كرد، دەیبردنەوە ماڵێ و بە نەخش و نیگار دەیڕازاندنەوە، ئێستە لە هەولێرێ ئەو بەردانە و نەخش و نیگەرەكانیانی كردووە بە براندێكی سەركەوتووی خشڵ و جوانكاری.
ناسكە عومەر (٢٨ ساڵ) لە قۆناغەكانی سەرەتاییی قوتابخانە و لە ماڵەوەش گرینگیی بەهونەری نەخش و نیگار دەدا، ئەو كاتەی دەستی بەخوێندنی كارسازی كرد، لە پڕۆژەكانی زانكۆدا، لە هەوڵێك بۆ تێكەڵكردنی هونەر و فاشیۆن، وەڵامی ئەو پرسیارانەی دایەوە كە لەمێژ بوو لە خۆی دەكرد، بۆچی تێكستوور و نەخشەكانی هونەری كوردی لەناو جلوبەرگ و پێداویستییەكانی جوانكاریی كوردەواریدا ڕەنگ نادەنەوە؟
ئەگەرچی خۆی دەڵێت ”قەت فکرم لەوەی نەدەکردەوە لەو بوارەیدا ببمە خاوەن ئیشی تایبەتی خۆم“، ئێستە كە چەند ساڵێك بەسەر تەواوكردنی خوێندنی زانكۆیدا تێپەڕیوە، لە نووسینگەیەكی كەشخەدا لە نهۆمە بەرزەكانی تاوەرێكی ناو شاری هەولێر، كە بەسەر شەقامێكی قەرەباڵغدا دەڕوانێت و ئێواران ڕۆژ لە بەرانبەر پەنجەرە گەورەكانی ئاوا دەبێت، بڕاندە كوردەوارییەكەی خستووەتە سەرپێ، لە ناوەخۆ و دەرەوەی كوردستاندا هەزاران پارچەی لێ دەفرۆشێت.

ناسكە لە شوێنی كارەكەیدا، هەر خۆی بازن و دەستبەند و گوارە و ملوانكەكانی ئەو كۆمەڵە خشڵانەی دەنەخشێنێت، كە ئیلهامەكەی لە مێژووی كوردستان، داستانە نەمرەكان، نەخشی خاڵكوتینی كوردەواری، جلوبەرگ و جامانە و سەرپۆشی جاران، وەردەگرێت.
تا ئێستە سێ كۆمەڵە بەرهەمی (ناسك كۆلێكشن)ی بڵاو كردووەتەوە، كە خۆی هەموویانی نەخشاندووە، بەشی شێری لە ڕێگەی ئۆنڵاینەوە لە هەردوو ئەپڵیکەیشنی لەزۆ و تۆتەرز لە بەشی تایبەت بەخۆی نمایش کراون، لە چەند شوێنێكی هەولێر و سلێمانیشدا بەرهەمەكانی نمایش كراون، لە عێراقیشدا لە هەردوو شاری بەغدا و بابل هەن، هەروەها كۆگەیەكیشی لە وڵاتی ئەڵمانیا كردووەتەوە، تا بەئاسانی بەرهەمەكانی ڕەوانەی ئەوروپا و ئەمەریكا بكات.

هەرچەند ناسكە بیرۆکەی نەخش و نیگاری تایبەتی لە خەیاڵی خۆیدا هەیە، بەڵام وەک خۆی دەڵێت لە قۆناغی یەکەمدا ویستوویەتی هەوێنی بەرهەمە دروستکراوەکانی لە هونەر و چیڕۆکە مێژوویییە کوردەوارییەکان هەڵێنجێت، بۆیە لە ماوەی سێ ساڵی ڕابردوودا، سێ كۆمەڵە خشڵی کوردەواریی بەناوەكانی ئەڤین، مینا خان و گوڵوەنی بەرهەم هێناوە.
ئەو كیژە هونەرمەندەی هەولێرێ، چیڕۆكەكانی پشت بەرهەمەكانی دەگێڕێتەوە و لە بارەی ئەڤینەوە دەڵێت ”كۆلێكشنی ئەڤین چوار پارچەیە، لە چیڕۆکێکی سێ هەزار ساڵ پێش ئێستە وەرگیراوە، تیایدا کوڕێک و کچێک یەکتریان خۆش دەوێت، هەر کاتێ کچەکە پرچی شانە کردووە، مووەکانی داوەتە خۆشەویستەکەی و ئەویش کۆی کردوونەتەوە و کردوونی بە مافوور، تاوەکو لە ماڵی ئایندەیاندا بە دیوارێیدا هەڵبواسن و بڵێن ئەوە چیڕۆكی خۆشەویستی مەیە“.
هەروەها باسی بەرهەمی مینا خان دەكات، کە لە ١٥ پارچە پێك هاتووە و دەڵێت ”لە چیڕۆکێکی ٣٥٠ ساڵ پێش ئێستەی وەرگرتووە، ئەو کاتە هونەرمەندێکی کورد هەوڵی داوە نەخشی گوڵێک دروست بکا لە پێکهاتەی سروشت، ناوی لەو گوڵە ناوە چاوی بەهەشت، کە چوار پەلکی هەیە و هەریەکە لەوانە هێمان بۆ هەوا، ئاو، خاک و ئاگر“.
بەرهەمی گوڵوەنی کە هەوریشی پێ دەگۆترێت، لە پێنج پارچە پێك هاتووە، ناسكە دەڵێت ئەوەیانی لە نەخشێکی هەرە کۆنی کوردەواری لە چیاکانی زاگرۆسەوە وەرگرتووە، کە هەشت هەزار ساڵ پێش ئێستە لە لایەن باب و باپیرانەوە بەکارهاتییە.
ئەو كچە هونەرمەندە خاوەنكارە، لە ڕێگەی براندەكەیەوە تەنها سوودی دارایی كۆ ناكاتەوە، بەڵكو دەڵێت سوورە لەسەر كاركردن بۆ ژیاندنەوەی هونەر و دەستڕەنگینیی کوردەواری و ئاماژە بەوە دەكات ”دەمەوێ گەشتیارانی بیانی و خەڵکی جیهان بە هونەر و چیڕۆکە جوان و خۆشەویستییەکانی کوردستان بزانن“.
بەرهەمەكانی ناسكە پڕ ڕەنگن، وەک خۆی دەڵێت ”زیاتر لۆ کچانن، لۆ تەمەنەكانی ٢٠ هەتا ٤٨ ساری، هەوڵیشم دایە لە ڕێی کەمکردنەوەی ڕەنگ و دەستکاریکردنی نەخشەكانەوە، ئیشی زیاتر لۆ پیاوانیش بكەم“. ئەوەشی گێڕایەوە كە دوای ئەوەی بە گەشتێك لە دانیمارك بووە و ژنێكی بەتەمەنی ئەوێ چەند بەرهەمێكی لێ كڕیوە، ئەویش وێنەی گرتووە و لە هەژماری ئینستگرامەكەی بڵاوی كردووەتەوە، كڕیارێكی زۆر ڕوویان تێ كردووە بۆ ئەوەی بەرهەمەكانی بە دیاری بۆ دایكیان و ژنە بەتەمەنەكان ببەن، چونكە وەك خۆی باسی دەكات لە وێنەكانی ژنە دانیماركییەكەدا، بەرهەمەكانی باڵكێش و جوان دەركەوتوون.

دوای ئەوەی ١٤ کۆرسی تایبەت بە براندینگ و پەرەپێدانی بوارەکەی بینیوە، تا ئێستە بەردەوامە لە هەوڵی خوێندن و فێربوونی زیاتر لە بواری گەوهەرناسیدا و دەڵێت ”هەندەی لە دوو پەرەپێدانی كوالیتیی ئیشەكەمم، لە دوو زیادكردنی فرۆش و قازانج نیمە، چونكە دەزانم هەر دەگەمە ئەو جێیەی پلانم لۆ دانایە“.
جگە لە پەرەپێدانی جۆریەتیی كارەكانی، پلانێكی دیكەی بۆ داهاتوو؛ كردنەوەی ماڵێكی كولتوورییە بۆ نمایشکردنی بەرهەمەکانی، كە مۆركی مۆزەخانەی گەوهەریی پێوە دیار بێت، تا لە ژوورەكاندا كارە كوردەوارییەكانی بەو شێوەیە بۆ سەردانیكەران نمایش بكات كە خۆی دەیەوێت، بۆ ئەوەی پەیامەكەی ڕوونتر بگەیەنێت، كە زیندووهێشتنەوەی ناسنامەی هونەری كوردییە لە ڕێگەی تێكەڵكردنی بەفاشیۆنی مۆدێرن.