دوای ڕێککەوتنە مێژوویییەکەی ساڵی ١٩٧٠ کە دان بەمافی ڕەوای گەلی کورد نرا و بەیاننامەی ئادار بووە ڕووداوێکی مێژوویی، کەسایەتیی مەلا مستەفا بارزانی وەک ناسنامەیەکی لێ هات بۆ کوردستان. حکوومەتی ئەو کاتی بەغدا کە لە دوای کودەتایەکەی ساڵی ١٩٦٨ جڵەوی حوکمڕانی وەرگرت، دیار بوو لە ئەنجامی بێهێزی و لاوازیی ئەو ڕێککەوتننامەی واژوو کرد، ئەگەر نا بەڕاستی هەوڵی نەدەدا خاڵەکانی ڕێککەوتننامەکە جێبەجێ بکا بەتایبەت یەکلاکردنەوەی بابەتی کەرکووک و لە ئەنجامدا سەرکردایەتیی کورد بەتایبەت خودی بارزانی بەڕاشکاوانە گوتی ”ئێمە مساوەمە لەسەر کەرکووک ناکەین و کەرکووک دڵی کوردستانە“.
بۆیە لە ساڵی ١٩٧٣ ڕژێمی بەعس دوای ئەوەی پێگەی خۆی توند کرد، لە بیانوو دەگەڕا بۆ پاشگەزبوونەوە لە داننان بەمافەکانی گەلی کورد، ئەوە بوو دەستی بەپیلانگێڕی کرد و هەوڵی تیرۆرکردنی چەندان کەسایەتی و سەرکردەی کوردی دا کە هەمووی تۆمار کراوە، تا گەیشتە ئەوەی هەوڵی تیرۆری خودی مەلا مستەفا بارزانییش بدا و لە هەموویان شکستی هێنا.
لە شاری هەولێریش دەسگەکانی ئیستیخبارات و موخابەرات خەریکی نانەوەی ئاژاوە و تێکدانی باری ئارام و سەقامگیریی ناو شار بوون. ئێمە ئەو کات قوتابیی ناوەندی بووین کە چەند تەقینەوەیەک لە گازینۆی باکوری بەرامبەر بازاڕ و لە قەدپاڵ قەڵای هەولێر ڕوویان دا و چەندین کەسی بێتاوان بوونە قوربانی.
بەیانییەکی زوو لە بەردەم کەبابخانەکەی سەید موعتەسەم لە ڕێزی چێشتخانەی تاجریان بۆمبی دانراوە تەقییەوە و سەید و کوڕێکی پارچە پارچە بوون، شێرزادی کوڕیشی کە لەوێ بوو، لە داخان و لە ترسان شێت بوو.
ئەو تەقینەوانە ترسێکی زۆر گەورەی خستە دڵی خەڵکەکە، بازاڕ و شوێنە گشتییەکان چۆڵ بوون. هێندەی نەبرد جەژن هات، منداڵ و هەرزەکار و گەنج گوێیان نەدایە ئامۆژگاریی دایک و باوکان، ڕوویان لە بن لەیلوکان و هەرسێ سینەماکەی حەمرا، سیروان و سەڵاحەدین کرد، بەڵام وەک جەژنەکانی ساڵانی دیکە نەبوو.
ئێمەی گەنجانی گەڕەکی عارەبانی ئەو کات، چووینە سینەما سەڵاحەدین، کە گەیشتینە ناو هۆڵەکەی سینەما جمەی دەهات پڕی سەرباز و خەڵکی دیکە بوو، شوێنی دانیشتن نەبوو تا دانیشین، بەپێوە وەستاین لەگەڵ دەیانی دیکە، لە ناکاو لەناو سینەما دەنگی (سسس) پەیدا بوو، بەرە بەرە دەنگەکە هەراشتر دەبوو، یەکێک لە تاریکیی ناو سینەما هاواری کرد (ئەوە فتیلی قونبەلەیە دەسووتێ، ئێستە دەتەقێتەوە)، بەچاوترووکانێک کەس نەبووە برای کەس، دەرگەی سینەما بەبەر نەدەکەوت هەموو تێکڕا بۆ دەرەوە ڕامان کرد و سینەما چۆڵ بوو.
