پێشانگەی نێودەوڵەتیی ئەمساڵی کتێب لە سلێمانی، خراپترین بوو، چونکە هەندەك یان زۆربەی ناوەندەکانی کتێب تا بن پیلان زەرەریان کرد، کەس بەمایەی خۆی هەرنەستاوە، بە جڕەجڕ بەشی کرێیەکەیان فرۆشت. کتێبفرۆشە ئاینییەکان قازانجیان کرد، بەڵام ئەوانیش وەک ساڵانی پێشوو نەبوون.
ئایا هۆکار چ بوو؟ خراپیی ئیدارەی پێشانگەکە؟ هێنانە پێشی کاتەکەی بوو هەتا لەگەڵ یادی مام جەلال بیگونجێنن؟ بەتاڵیی گیرفانی خوێنەران بوو؟ نرخی کتێبەکان گران بوو؟ خەتای ناوەندەکان بوو؟ شوێنەکە دوور بوو؟ کرێی شوێنەکە زۆر بوو بۆ کتێبفرۆشان؟ کرێی ژوورێکی وا بچووک بۆ هێندە گرانە؟ ئایا پێشانگەی کتێب قۆرخ کراوە؟ ئی هەولێریش زۆر گرانە.
نەدەبا کاتەکەی بیننە پێش. دەبا دوای وەرگیرانی قوتابیانی زانکۆ و پەیمانگەکان با، وەک هەموو ساڵێ، چونکە قوتابیانی ساڵی یەکەم دەچن لە پێشانگە سەرچاوە و کتێبەکانیان دەکڕن.
شوێنەکە بەخۆی دوورە لە شار، ئینجا ڕێیەکەش کاری تێدا دەکرا، کاریگەرییەکی خراپی هەبوو. ئیدارەی پێشانگەکە بە جەماعەتی ئەمنیشەوە مامەڵەیان خۆش نەبوو لەگەڵ کتێبفرۆشان، چەندان جار دەمەقاڵی ڕووی دابوو، بەتایبەتی لەگەڵ برادەرانی هەولێر.
لەناو ئەو هەموو زەرەر و ناڕەزایییەی ناوەندەکاندا، زۆربەی کتێبفرۆشان لیستی پڕفرۆشترین کتێبیان ڕاگەیاند. ئێ باشە لەو بێ بازاڕییەدا، لیستی پڕفرۆشترینتان لە کێندەر هینا؟ ئەگەر کتێب بیست دانەی لێ بفرۆشرێت، ئەوە پڕفرۆشترینە؟ ئاخر ئەوها نییە، سنعاتەکەشتان ڕەزیل و پووچ کردییە.
کتێبفرۆش هەیە تیراژی کتێبێکی پەنجا دانەیە، نووسیتی هەزار دانە. ئەوەی هەزاریشە، کردیتییە دە هەزار. چ بەوە بڵێین؟ کلاوچی یان درۆزن؟ مادام بەردەوام زەرەرتە، کوە هەر بەردەوامی و کرێ و هەقی كرێكارانیش دەدەی؟ ئەو کونە لە کێندەرە ئەنگۆ ئەو پارەیەی لێ دەینن؟
ئەم پرسیارەش زۆر گرینگە، ئەرێ لۆ هەمووتان هێرش دەکەنە سەر کڕیاری کتێبە ئاینییەکان؟ خوێنەر ئازادە چ کتێبێک دەکڕێت. یەکێك لەو هۆیەکان ئەوەیە، ڕۆشنبیرانی مە کتێبی زۆر خراپیان چاپ کرد و خوێنەران لێیان کشانەوە.
هەر بەڕاستی، زۆریی خوێنەری کتێبەیلی ئاینی بۆ ئەوە دەگەڕێتەوە نووسەرانی مە، زۆربەیان بەو بەرهەمە کرچوکاڵانەیان شەڕ لەگەڵ خودا دەکەن، بە حسێبی خۆیان چاوی کۆمەڵ دەکەنەوە، نازانن کە تاکەکانی کۆمەڵ لەوان دوور کەوتنەوە و خوویان دایە ڕەوتەیلی ئیسلامی.
