هێشتا تەمەنم بيست و دوو ساڵی تێپەڕ نەکردبوو، بۆ جاری يەکەم وڵاتم جێ هێشت. ئەو كات ڕژێمی بەعس خەريکی ڕاگواستنی دێهاتە سنووريیەکانی کوردستان بوو بۆ ئۆردووگە زۆرەملێيەکان و بەناوی (تەعويز) خەنیی کردبوون.
وێنەی ئەو ڕاگواستنە لەو ساتەوەختەدا کارێکی زۆر خراپی کردبووە سەر باری دەروونی خەڵکی کوردستان. بەتايبەتی توێژی گەنجان، ئەوانەی دوای ئيتفاقيەی شوومی جەزائیر ساڵێک يا دوو ساڵ بوو لە ئێران گەڕابوونەوە.
لەو ساتەدا وەكو سەتان گەنج بەبيانووی گەشت، سەری خۆم هەڵگرت بەرەو ئەوروپا.
لەو سەفەرە و سەفەری دوای ئەويش هەرچی کردم نەمتوانی ئازاری غوربەت نەچێژم، چونکە وڵاتەکەم و شارەکەم تژی بوو لە خزم و دۆست و هاوڕێی گەڕەک و هەر چ کاتێک بەشەقامی موزەفەريەی هەولێر گوزەرم بکردايە، لەبەر ڕاوەستان لەگەڵ دۆست و برادەران و ئەحبابەکانم، بەسەعاتێک لە دەرگەی شەقامی موزەفەريە نەدەگەيشتمە فولکەی کۆتری سەلام و چايخانەی قەرداران.
لەو وەستە ديدارانە دوای هەواڵ پرسين دەکەوتينە گێڕانەوەی يادگاریيەکانی سەردەمی قوتابخانە و ڕۆژانی مانگی هاوين و خوێندن لە حوجرە لە خزمەت مامۆستا مەلا سابير و مامۆستا مەلا ئەبوبەکر ڕەحمەتی خوايان لێ بێت.
زۆر جار هێندێک لە هاوڕێکانم بێتاقەت دەبوون، کاکە ئەتو زۆر لەگەڵ برادەران ڕادەوەستی، ئێ بەسە سەلامێک بکە و بڕايەوە، ئەمنیش بە سروشتی خۆم کەسێکی کۆمەڵايەتیم و حەزم بەپەيوەندیی کۆمەڵايەتی و هەواڵ پرسينی دۆست و ئەحبابەکانمە، ئەوەشم لە باب و باپيران بە ميرات بۆ ماوەتەوە.
بەو پێيەی من ساڵانێک لە قوتابخانەی سەرەتايیی مەريوان دەمخوێند، زۆرێکی هاوڕێی پۆلم بە تورکمانی قسەيان دەکرد، وای کرد منيش زمانی تورکمانی فێر ببم.
بەڵێ کاتێک سەفەری ئەوروپام دەکرد لەو سەردەمە، تەواو هەستم بە غوربەت و ساردوسڕيەک دەکرد، ئەوەی زۆر هەستم پێ دەکرد و ئازاری دەروونیی دەدام، نە ئەستێرەم دەديت نە قەڵا سەرکەشەکەی هەولێرێ.
وڵاتێکی داخراو و مرۆڤ وەک ماکينە هەر خەريکی کار بوون.
يەکەم وڵات سەردانم کرد ئيتاڵيا بوو، وڵاتێک ئاووهەوايەک و خەڵکێکی باش و کچی شۆخ و شەنگی لێ بوو، هەموو ئەوانە تۆزقاڵێک کاريگەریيان نەبوو لەسەر ئيحساسم وەکی هەولێرێ، هیچیان وەكی جوانیی خەڵکی هەولێرێ فێنکيان بە دڵمدا نەدەهێنا.
