جۆتە دار، دوو داری ئەستووری کەسک نییە، دارێکی پیری ماندووی ناو هەزاران دارە، لەناو بەردەڵانێکی سەختە، بەسەر نێوچەوانی چیای ''سەفین''ەوە ماوە!
ئەو دارە، دوو لقەکەی، سێبەرێک بووە، هەواری دوو جووتیاری ماندوو بووە، کێ ناوەکەی لێ ناوە؟ ڕەنگە شەقڵاوەیییەکی موسوڵمان و دیانێکیان زۆر باش ئەوە بزانن!
جۆتە دار، بەئاسانی لەناو سەفینی دارستان، بەرزایی، ملوانەکەی ئاسمان، سەرینی بەفر، سێبەری ماڵی دیانان دەناسرێت، دەدۆرزێتەوە، زۆر کەس ناوی بزانێت! بەڵام پاش ئەوەی جۆتە دار؛ دەبێتە خولیای شاخەوانانی شەقڵاوە، پیرۆزیی شەیدایانی ژینگە، سروشت کیشوەر، قەد و پیرۆزییەکەی دەدۆزنەوە، دەیناسنەوە.
بەڕێککەوت شاخەوانێکی ماندوو، سڵاوێکی لێ دەکات، میوانی دەبێت!
لەوێ جۆتە داری لەبیرکراو، بیرەوەریی هەزاران پیرە خۆشناویان بۆ دەگێڕێتەوە، سەربردەی ئەشکەوتی مەتڕانەکانیان بۆ باس دەکات.
لەو ڕۆژەوە جۆتە دار زیندوو، بڵند، دەبێتە هەزار سەربردە و هەنگاو و نیگای جوان!
''گرووپی شاخەوانی شەقڵاوە''، کۆمەڵە پیاوێکی چوارشانە، خۆبەخش، ماندوو، بەورە، بەتوانا، بڕیار دەدەن جۆتە دار، هەوارەکەی بکەنە مەڵبەندێکی دیاری شاخەوانی، هەوارێکی ناوازەی چیای سەفین و کوردستان.
ئەوانەی ڕۆژانە، بەردەوام بۆ سەیران، پیادەڕۆیی، ماچکردنی سروشت ڕووی تێ دەکەن، لەوێ پشووێک دەدەن، چایەک، دووان، هەزاری لەناو کۆنە کترییەکی ڕەش، بەدار دروست دەکەن، بەکۆمەڵ لەگەڵ سڕینەوەی ئارەقەی سەرکەوتن، حەسرەتی دیتنی جۆتە دارەکە دەخۆنەوە.
من دەزانم، هەموو شاخەوانەکانی کوردستانیش دەزانن؛ لەوێ چا خۆشترە، گەرمە و سارد نابێتەوە، تاڵەکەشی شیرینە!
لەوێ هەموو ماڵ، باخ، جۆگەکانی شەقڵاوە، سێبەری چنارەکان، بەژنی لاری شەنگەبی، سەمای لقی دارمێوی باخچەکانی شەقڵاوە دیارن!
گرووپی شاخەوانی شەقڵاوە، لەو جۆتە دارە موستەحیلێکی مەردانە دەکەن، شاخ کون دەکەن، بەرد نەرم دەکەن، کەڤرە گەورەکان دەتاشن.
بەپشت، کۆڵ، ئازارەوە؛ ئاسن، دار، کارەبا، کەرەستەکانی بۆ بار دەکەن، هەمووش خۆبەخشانە ئەوە دەکەن!
لەوێ هەوارێک بە ئەندازە، جوانییەکان، ناسک ساز دەکەن. مەردانە جۆتە دار دەکەنە سومبڵ، چرای جوانییەکانی سەفین. لە دوورەوە لە بەرزایییەکانی شاخی سپیلک و دوورتریش، شەوانەی چراکانی سەر کەمپی جۆتە دار دیارە، دەبریسکێتەوە!
لەو جۆتە دارە، جۆت جۆت، بەکۆمەڵ، ژن و پیاوانی شاخەوان نەرم نەرم بۆی سەردەکەون، دەحەسێنەوە، لەوێ دەزانن، تێ دەگەن؛ گرووپەکە چەند ورەیان بەرز و تاقەتیان هەبووە. لەوێ موعجیزەی کار، خۆبەخشی دەسەلمێنن، بە سەفین دەڵێن؛ سوپاس بۆ بوونت!.
