لە ماوەی دەیان ساڵ كاری كنە و پشكنین لە ئەشكەوتی شانەدەر، تا ئێستە ١١ پەیكەری مرۆڤی نیاندەرتاڵ دۆزراونەتەوە و بەشێكیان گوێزراونەتەوە بۆ بەغدا، هه‌وڵیش ده‌درێت مۆزه‌خانه‌یه‌ك له‌و ناوچه‌یه بكرێته‌وه بۆ پاراستنی ئه‌و پارچه شوێنه‌وارییانه‌ی ده‌دۆزرێنه‌وه.
د. عەبدولوەهاب سلێمان بەڕێوەبەری شوێنەوار و كەلەپووری ئیدارەی سۆران ڕای گەیاند زیاتر لە هەزار شوێن و ناوچەی شوێنەواری لە سنوورەكەیان تۆمار كراون، یەكێك لەوانە ئەشكەوتی شانەدەره، بۆ یەكەمین جار تیمێكی شوێنه‌وار به‌سه‌رۆكایه‌تیی زانای بەناوبانگی زانكۆی كۆڵۆمبیای ئەمریكی ڕاڵف سولیكی ساڵی ١٩٥١ تا ١٩٦١ كاری هەڵكۆڵینی تێدا كرد، ١٠ ئێسكە پەیكەری نیاندەرتاڵی لەم ئەشكەوتەدا دۆزییه‌وه.
لە چەند ساڵی ڕابردووشدا گرێبەست لەگەڵ تیمی زانكۆی كامبرێدجی بەریتانی كراوە، تا به‌هەماهەنگیی تیمەكانی خۆیان كاری كنە و پشكنین لە ئەشكەوتی شانەدەر بكەن، سه‌ره‌نجام توانراوە ئێسكە پەیكەری یازدەمی مرۆڤی نیاندەرتاڵ بدۆزرێتەوە، ئه‌ویش كه‌لله‌سه‌ری ئافرەتێكی تەمەن چل ساڵ بوو، مێژووەكەی بۆ ٧٥ هەزار ساڵ له‌مه‌وپێش دەگەڕێتەوە.
كه‌لله‌سه‌ره‌كه كەوتبووە ژێر بەرد و ورد و خاش بووبوو، بۆیه بەمەبەستی چاکكردنەوە براوەتە بەریتانیا و پشكنینەكانی لە زانكۆی ئۆكسفۆرد بۆ ئەنجام دراوە.
سه‌باره‌ت به‌هۆی بوونی ئێسكە پەیكەری نیاندەرتاڵەكان، لە مۆزەخانەی نیشتمانیی بەغدا، د. عه‌بدولوەهاب سلێمان، ڕوونی كرده‌وه كاتی خۆی به‌گوێره‌ی یاسای شوێنەواری عێراقی تیمە شوێنەوارییە بیانییەكان لە كاتی هەڵكۆڵینەكان هەر شتێكی شوێنه‌واری بدۆزنەوە، نیوه به‌نیوه بووه، نیوەی بۆ تیمە بیانییەكان و نیوەیشی بۆ حكوومەتی عێراق، له‌به‌رئه‌وه‌یه ئەو ئێسكە پەیكەرانەی نیاندەرتاڵەكان براونەتە مۆزەخانەی بەغدا، به‌ڵام داتایەكی تەواو لە بەردەستدا نییە كه چه‌ند له‌و ئێسكه په‌یكه‌رانه له به‌غدان.
بەڕێوەبەری شوێنەوار و كەلەپووری ئیدارەی سۆران هەوڵ دەدەن لەگەڵ ئیدارەی سەربەخۆی سۆران، بۆ دروستكردنی مۆزەخانەیەكی شوێنەواری و كەلەپووری، تا ئەو پارچە شوێنەوار و كەلەپوورییانەی لە سنوورەكە دەدۆزرێنەوە، لەوێ هه‌ڵبگیرێن، هەوڵیش ده‌ده‌ن بۆ گەڕاندنەوەی ئێسكە پەیكەری نیاندەرتاڵەكان و ئەو پارچە شوێنەوارانەی سنوورەكە كە بۆ عێراق و دەرەوەی وڵات گوێزراونەتەوە.
ئەشكەوتی شانەدەر دەكەوێتە زنجیرە چیای برادۆست لە دەڤەری بارزان، له سنووری ئیدارەی سەربەخۆی سۆران، مێژووەكەی بۆ سەردەمی بەردینی كۆن دەگەڕێتەوە و بەكۆنترین ئەشكەوت دادەنرێت لە هەرێمی كوردستان و عێراقدا، لە ناوەڕاستی سەدەی ڕابردوو تا ئێستە بەچەند قۆناغێك كاری كنە و پشكنین لەم ئەشكەوتە كراوە.
