”ڕوو ئەنێمە ئیمام حوسێن، دوعای خێر بۆ هەولێر ئه‌كه‌م“
ژنە كوردێكی خانەقینییە، بەر لە ١٤ ساڵ، دوای ئەوەی مێردەكەی بەهۆی تەقینەوەی بۆمبێکی چێندراو لە بەغدا كوژرا، پەنای بۆ هەولێر هێنا. ئێستە لە گەڕەكی باداوە چێشتخانەیەكی بچووكی هەیە، جگە لە پەیداكردنی بژێویی خۆی و منداڵەكانی، بووەتە سەرچاوەی بژێویی خەڵکی دیکەش.
ناهیدە سەعد (تەمەن ٤٩ ساڵ)، پێنج منداڵی هەیە و دەرچووی پەیمانگەی تەکنیکیی بەغدایە، دوای ئەوەی بەهۆی دۆخی خراپی ژیان لە بەغدا و نەبوونی ئاسایشەوە، ڕوو لە هەولێری ئارام دەكات، له گه‌ڕه‌كی باداوه دوكانێك دەكات بە چێشتخانە، له كاتژمێر سێی ئێوارەوە تاكو یه‌كی دوای نیوەشەو ١٠ جۆرە خواردنی كوڵاو و برژاو پێشكێش دەكات و ناوبانگێكی باشی پەیدا كردووە.
ئەو ژنە كە بە مەزهەب، موسوڵمانی شیعەیە، بۆ (گڵكەند) دەڵێت جگە لەوەی كارەكەی سەرچاوەی بژێوییە، خۆشیی زۆریش لە ئامادەكردن و پێشكێشكردنی خواردن بە میوانەكانی دەبینێت، بەتایبەتی كە دەزانێت تام و چێژی خواردنەكانی بە دڵی كڕیارەكانیەتی. خۆشحاڵیشە بەوەی لە هه‌ولێر بەئارامی دەژیت، نەك ڕێگری و كێشەی بۆ دروست ناكرێت، لەلایەن خەڵكیشەوە یارمەتیی زۆر دەدرێت. دەڵێت ”ئێرە ئامنه، هیچ موشكیلەكمان نییه، خۆشترین شوێنه، خه‌ڵك زۆر موحته‌رەمن، دێن لام نان دە‌خۆن، كەس قەت قسه‌ی خراپی نەكردییە، زۆر مەمنونم لێیان“.
ئاماژەش بە كولتووری پێكەوەژیانی هەولێر دەدات كە بێ جیاوازی هەمووان پێكەوە دەژین و دەڵێت ”هەست بەغوربە ناکەم، ئەلحەمدولیلا حه‌یاتمان ئامنه، ئه‌مه زۆر موهیمه، شه‌و هه‌یه سه‌عات دوو ده‌چمه‌وه، كه‌س شتێكی خراپ ناڵێت، حەتا ئێستە كەس بە منی نەگوتییە تۆ شیعه‌ی، دائیم ڕوو ئه‌نێمه ئیمام حوسێن و ئیمام عه‌باس، دوعای خێر بۆ خه‌ڵكەکەی ئێرە ده‌كه‌م“.
ناهیدە، كە لە چێشتخانەكەیدا ده‌رفه‌تی كاری بۆ كوڕ و كچێكی هه‌ولێری ڕه‌خساندووه، هانی ژنان ده‌دات، له هه‌ر شتێك شاره‌زایییان هه‌بێت، هه‌وڵی بۆ بده‌ن و كار بكەن. ئەوەش ناشارێتەوە كە به‌شێك له كه‌سوكاره‌كه‌ی لە بەغدا دەیانەوێ ڕێگری له كاره‌كه‌ی بكه‌ن، به‌ڵام ئه‌و پەیداكردنی بژێوی و وه‌ستان له‌سه‌ر پێی خۆی، به شه‌ڕه‌فمه‌ندی ده‌زانێت.
