لەناو قەرەباڵغیی بازاڕدا، کە فرۆشیار بەسەر عەرەبانەکانیانەوە وەستاون و بەهاواركردن نرخی كاڵاكانیان ڕادەگەیەنن، چێشتخانەیەکی بچووک لە پەنایەكدا بووەتە ناندەری كاسبكارە هەژارەكان، بەنرخێكی هەرزان یان وەك دەڵێن بەنرخی برنج و شلە (سادە)، برنج و گۆشت و شلە دەفرۆشێت.
شێروان سابیر، لەگەڵ گۆڕانی وەرزەکانی ساڵدا، شلەكان لە بامیە و باینجانەوە بۆ فاسۆڵیا و قەیسی دەگۆڕێت، بەڵام ئامانجە سەرەكییەكەی ناگۆڕێت كە فرۆشتنی خواردنە بەنرخی هەرزان.
ئەوانەی نیوەڕۆیان لەو چێشتخانەیە نان دەخۆن، هەژار و کاسبکارانن، نەک خواپێداو، بۆیە خاوەنی چێشتخانەكە لە بریی قازانجی زۆر، ڕۆژانە بە قازانجێكی كەمەوە، دڵ و گەدەی كڕیارەكانی خۆش و تێر دەكات.
سەرەتا ئەو خواردنگەیە كە ناوی (حاجی سەمیر)ە، لەناو قەیسەری بوو، دواتر گوازرایەوە بۆ نزیك فلكەی (كۆتری سەلام) و گەورە كرا، وەك شێروان بۆ (گڵكەند)ی باس كرد ”بازاڕ خەركەكی كاسبكاری تێدایە، دارایییان ئەوها باش نییە، بە زۆری عارەبانچی، عەمەلە، دەستگێڕ و شاگرد دێنە ئێرە، لۆیێ ئەمە برنج و مریشكیان بە سعری سادە دەدەینێ“.
لەو چێشتخانەیە، برنجی سپی یان برنجی سوور، بریانی، یان ساوار و گەنمەكوتا بە شلە و گۆشت و سەوزەوە، بە سێ هەزار دینار پێشكێشی كڕیار دەكرێت.
خاوەنی چێشتخانەكە دەڵێت فرۆشتنی گۆشت و برنج بەنرخی سادە، قازانج كەم دەكاتەوە، به‌ڵام ئەوەیان‌ له‌به‌رچاو گرتووە كە فرۆشیان زۆر بێت و قەرەبووی ‌قازانجە كه‌مەكە دەكەنەوە.