دوکانەکەى وەستا فواد عەبدوڵڵا حەمەد سەفار لەناو بازاڕى قەیسەرى لە نێزیک دەرگەى کۆترى سەلام لە سووچى پەڕەچییەکان بوو. ساڵی ١٩٢٨ لە قەڵات لەدایك بووە، سەرەتا لە لاى باوکى کارى کردووە و پاشان دوکانى خۆى داناوە و لە کارى سەفارى بەردەوام بووە و دوو کرێکارى هەبووە بە ناوەكانى سەعدى حاجى شەریف و عەدنان.
پیشەکەى وەستا فواد بریتی بووە لە کارى دروستکردنى مەنجەڵى گەورە و بچووکى سفر و پاککردنەوە و زەردکردنەوەیان و دروستکردنى مەسینەى سفر و لەگەن و کەلوپەلى ترى لە سفر دروستکراو.
هۆکارى بەزۆرى بەکارهێنانى کەلوپەلى سفر دەگەڕێتەوە بۆ ئەوەى کە ئەم ماددەیە زوو تێک ناچێت و ناشکێت، لە لایەکى تریش ئەم جۆرە قاپ و قاچاخانەى لە شووشە و فەخفوورى بەکار دەهات، زۆر کەم بوون و بەهایان گران بووە لە چاو کەلوپەلى سفر و فافۆن، بەزۆرى لە لایەن خەڵکانى گوندنشین بەکار هاتووە، چەند پیشەوەرێکى سەفارچیاتیى دیكەش لە هەولێر هەبوون وەک عادل سەفار و سەلمان سەفار و سەید سەعید سەفار.
وەستا فواد، چوار کوڕى لە دواى خۆى بەجێ هێشتووە، ئازاد، نیهاد، عیماد و حیکمەت، ساڵى ١٩٩١ کۆچى دواییی کرد.
هەروەها چەند پیشەوەرێکى دیكەش هەبوون لەوانە حاجى سەعید و حاجى لەتیف و ئەحمەد مەلا لەتیف و مامە ڕەفعەت قەزانچى حاجى ئەحمەد سەفار و سەید ئەنەس قەزانچى.
قەزانچى وشەیەکى تورکییە واتە ئەوەى مەنجەڵ دروست دەکات.